محاورة حبيبين إفترقا

كلام الشاب :
تنامين انتي ملو عينك...وعيني دوم سهرانة
ضحكاتك نغم عالعود......وقلبي ينوح باحزانه
تذكرين اول لقاء إلنا...شقد كنتي خجلانة
قلتيلي إلك وحدك .......قلبي فتح بيبانه
شقول عليك يالمحبوب.....روحي بيك ولهانه
أخذ مني عهد صادق.......لغيك ماأصير آنا
روح وترد بأمل .........عسى عالخير ملقانا
وسافرت بس بالجسم.......وعندك روحي هنانا
************
ورجعت من السفر ملهوف...لشوفة أغلى إنسانة
أريد أحكي عن اشواقي....وأبكي بين ذرعانه
وصلت لحد باب البيت.....لقيت الدبكة عمرانه
عرفت اني الي عشقته سنين...راح اليوم وخلانا
بودي اشريلك هدية......بس محتار يافلانة
شما أهديك ضايع بيك.....لأنك حيل خوّانه

رد الفتاة :
يكفي ظلم يالمحبوب.....ناري بقلبي شعلانه
بعدك دنيتي كلها.......لحزني ماهي وسعانه
تعتب,والذنب ذنبك......وكل عمر البنت غلبانه
بعد لاتلوم عالضحكة.....إن صارت حيل رنانة
من يوم رحلت عني ......عيوني الدمع عشقانه
***********
ثلث سنين ياظالم.......خبر منك فلا جانا
مدري بيك وين انتا.....بقيت انتظر حيرانه
سيرة صرت للواشي.......وسالوفه على لسانه
تحديت الدنيا كلهابيك...بظني آني ربحانه
بروحي تاجرت وياك......واثاري التجرة خسرانه
************
أريد أنساك يابن الناس...وأنسى أيام ملقانا
على جبيني أظن مكتوب....أقضي العمر حزنانه
أقضي العمر بكيانه
أقضي العمر ولهانه

***تأليف:الشاعر ***